И-мэйл:
mychina@yahoo.com
Хаяг:
БНХАУ, ӨМӨЗО, Эрээн хот, Шилийн дүүрэг,
Лүн шиан барилгын материалын зах Н-5 тоот.Хятад утас: 0086-13191555510, 18648045510,
Баннер
|
 |
| Гурилтай шөлөөр тэрбумтан болсон | |
|
Монголчууд "Шөлөөр цадаж, Төлөөр баяжина" гэж ярьдаг нь оргүй хоосон үг биш л дээ. Шөл бол хүний биед хамгийн их өл залгадаг хоолны нэг юм. Зөвхөн шөлөөр баяжсан хүмүүсийн намтар их байдаг.
Энд би мистер Ли (Lǐ Xiān Sheng ) хэмээх Хятад эр анх Америкт "California Beef noodle" буюу "Калифорны үхрийн махтай гурилтай шөл"-өөр хэрхэн баяжсан түүхийг өгүүлэх гэсэн юм.
Америкт бизнесийн гараагаа эхэлсэн Ли хэмээх Хятад эр их азтай хүн юм. Тэрээр "Гурилтай хоол"-оор тэрбумтан болсон билээ.
"Гурилтай шөл" гэдэг идэхэд тун өег бөгөөд өөрийн өртөг хямд хоолнуудын нэг.
Ли хар багаасаа гурил зуурч, ээждээ тусладаг байсан бөгөөд гурил татаж сунгахдаа их чадварлаг нэгэн байсан байна. Тэрээр Калифорний усан онгоцны гарам дээр өдөржин ачаа зөөж, орой нь гэртээ ирээд татсан гурилтай шөлөө хийж иддэг байв. Ийнхүү хүч тамираа нөхдөг байсныг нь хамт ажилладаг Паул хэмээх негр эр санамсаргүйгээр олж мэджээ.
Ли бие жижигхэн ч гэсэн аварга биет Паулаас дутахгүй ажилладаг байсан тул түүний "Эрч хүчийн нууц"-ыг олж мэдэхээр нэг өдөр Паул гэрт нь нууцаар дагаж очсон байна.
Тун удалгүй Ли-гийн гэрээс анхилуун сайхан хоолны үнэр үнэртэж эхлэхэд, өлөн Паул тэсэхээ байгаад гэрт оров. Ли том аяганд гурилтай хоолоо аягалаад зогсож байлаа.
Гэнэтийн зочин орж ирсэнд Ли баярлан найзыгаа хоолоороо дайлж гэнэ. Хожим нь Паул дурсамжиндаа:
"Ли-гийн хийсэн гурилтай хоолыг өдөр бүр идсэн ч уйдахгүй" гэсэн байдаг.
Үхрийн шөлөнд чанаж болгосон татсан гурилын амтанд орсон Паул Ли-д санал гаргаж гэнэ.
- Чи өдөр болгон надад нэг аяга хоол хийж өгвөл би нэг доллороор худалдаж авья гэжээ.
Нэг хүний хоол хийх, хоёр хүний хоол хийх нь Ли-гийн хувьд ялгаагүй байсан тул даруй зөвшөөрч, хоёр найз тохиролцоонд хүрчээ.
Маргаашнаас нь эхлээд Ли хоёр хүний хоол хийдэг болж сарын цалин нь 30 доллороор нэмэгдсэнд их баяртай байлаа. Тэрээр сард 60 доллорын цалин авдаг байсан бол 90 доллорын цалинтай болсон нь түүний хувьд ард үлдсэн ээж, охин дүү хоёртоо мөнгө илгээх боломжтой болов.
Тун удалгүй Ли-гийн хийсэн хоолыг Паул хамт ажиллагсаддаа ярьж, гурилтай шөлний амтыг үзэх гэсэн хүсэлт бөөн бөөнөөрөө ирлээ.
Энэ үед Паул Ли-д хандан "Чи ер нь ажил хийгээд хэрэггүй. Энэ хоолныхоо гуанзыг ажлынхаа хажууд нээчих. Тэгвэл хүн болгон чиний хоолыг нэг доллороор худалдан авч идэх болно" гэж зөвлөжээ.
Усан онгоцны гарам дээр түүний хамт ажилладаг найзууд гэвэл бүгд 12 хүн. Тэд бүгд Ли-гийн хийсэн хоолыг худалдан авч идвэл Ли сардаа 360 доллорын орлоготой болох байлаа. Гэвч түүнд гуанз нээхэд хүрэлцэх мөнгө байгаагүй тул гэрээсээ хоолоо зөөхөөр болжээ.
Эхний 3 өдөр Ли гэрээсээ хоолоо зөөж ажилчдад худалдаж гэнэ. Энэ байдлыг усан онгоцны гарамын эзэн мэдсэн байлаа. Энэ нь Ли-гийн хувьд азтай тохиол болсон юм. Учир нь түүний хийсэн хоол ажилчдад хүч тамир нөхөж байгааг Усан онгоцны гарамын эзэн Паулаас сонсож мэдсэн байжээ.
Иймд усан онгоцны гарам дээр ажиллаж байгаа бүх ажилчдын хоолыг хийдэг гуанз нээхийг нь тэрээр зөвшөөрөөд зогсохгүй, ажилчдын хоолны газрыг түрээсээр ашиглахыг зөвшөөрчээ.
Усан онгоцны гарам дээр нийт 5 бригад ажиллах бөгөөд бригад бүр 12 ажилчинтай байлаа. Нийт 60 хүний хоол хийвэл, өдөр бүр нэг сарынхаа орлоготой тэнцэх хэмжээний мөнгө олох тооцоо гарчээ.
Өглөө бүр Ли мал нядалгааны газар очиж, үхрийн шулсан яс худалдаж авна. Бүтэн үхрийн шулсан яс худалдан авахад ердөө 15 доллор. Ажлынхаа байранд ирмэгц худалдаж авсан ясаа том тогоонд хийж гал дээр тавьчихаад, хүнсний зах явж шинэ гурил худалдаж авна. Ирээд гурилаа зуурч дуусахад, шөл нь буцалж байдаг байв.
Багаасаа хийж сурсан ажил болохоор шөл буцалмагц Ли ажилчдыг хоолонд нь урьж, гурилаа тэдний нүдэн дээр сунгаж татаад тогоо руу шиднэ. Энэ бүх процесс маш хурдан үргэлжлэх бөгөөд ажилчид ч гурилыг сурамгай татахыг нь харах дуртай байлаа.
Гэвч Ли-гийн хувьд энэ байдал удаан үргэлжилсэнгүй. Өдөр бүр шинээр ирэх зочдын тоо нэмэгдэж, түүний тооцоолсон орлого санаанд оромгүй хурдан өслөө. Ли ганцаараа олон хүний хоол хийх хүч хүрэхгүй болмогц, Паулыг өөрийнхөө туслах ажилчнаар татан оролцуулж, сард 120 доллорын цалин түүнд амлав.
Ли-гийн бизнес өргөжин тэлж байгааг усан онгоцны гарамын эзэн ихэд таатай хүлээн авч, түүнд ажлын байраа томсгохыг зөвлөв. Ажлын байрыг томсгоно гэдэг бол гарамын эзэнд бас ашигтай байсан нь мэдээж. Түүний түрээсийн төлбөр дахин нэмэгдэнэ шүү дээ.
Хагас жил өнгөрөхөд Ли-гийн өдрийн орлого 1000 доллор давж, түүний үнэнч фенүүдийн тоо улам бүр нэмэгдэх болов.
Ли өөрийн гэсэн томоохон зоогийн газар нээхээс өөр аргагүй байдалд хүрч, усан онгоцны гарамын хажууд нэг ээлжиндээ 200 хүн хүлээж авч чадахаар том зоогийн газар байгууллаа.
Ли-гийн зоогийн газар 30 гаруй ажилчинтай болж, өдрийн орлого улам бүр нэмэгдэх болсон нь санаанд оромгүй явдал байсан юм.
Удалгүй Ли Калифорнид татсан гурилын үйлдвэр байгуулж, Калифорний галт тэрэгний буудал, их дээд сургуулиуд, томоохон үйлдвэрүүд, худалдааны захууд дээр "California Beef noodle" гэсэн хаягтай түргэн хоолны газруудаа нээж, түүний сарын орлого 800 мянган доллор болов.
Үйлдвэрийн мянга мянган ажилчид, их дээд сургуулийн оюутнууд бүгд л түүний "улаан фен" болсон байлаа.
2 жилийн дараа цар хүрээ нь Калифорни мужаас хальж, "California Beef noodle" гэсэн хаягтай түргэн хоолны газрууд Америкийн бусад хотуудад борооны дараах мөөг шиг ар араасаа цувран нээгдлээ.
Энэ түүх одоо ч гэсэн үргэлжилсээр. . .
Уншигч та Бээжин хотод ч энэ хоолыг амтархан идэж болно. Түүний нэртэй зоогийн газрууд Хятадын бүх хотод "California Beef noodle" гэсэн нэрээрээ гурилтай хоолоо хийсээр л байна.
Манай Монголчуудын өдөр бүр идсэн ч уйддаггүй "Алдарт гурилтай хоол" маань дэлхийн брэнд болчихоод байна.
Иймд уншигч танаас энэ бизнесийг эх орондоо хийгээсэй гэж хүсье.
Энэ бизнес хөрөнгө оруулалт бага шаардах бөгөөд хурдан хугацаанд хөгжих боломжтой юм. | | | | 1157 удаа үзсэн |
|
Зохиогчийн Эрх © 2012 Тоног Төхөөрөмжийн Төрөлжсөн Сайт. Бүх Эрхийг Хуулиар Хамгаалсан. Powered By Undurkhaan-IT Co,.Ltd. 
